تخاطيف مع شريف
تخاطيف مع شريف
السلام عليكم ورحمة الله وبركاته
أهلا بكم فى حلقة جديدة من برنامج تخاطيف مع شريف وقبل ما نبدأ حلقة النهارده تجاوب الأول على سؤال الحلقة إللى فاتت واللى كان ما هى السورة التى ختمت باسم إثنين من الأنبياء؟
والجواب هو سورة الأعلى
حلقة اليوم
تعالوا نبدأ حلقة النهارده واللى اتفقنا من الحلقة إللى فاتت اننا هنتكلم فيها عن
هنعمل ايه قبل شهر رمضان ؟
هما أربع حاجات هنعملهم مع بعض علشان ندخل رمضان صح ونكمل بعده صح
الحاجة الأولى هى التوبة :-
الأصل فى الإنسان عامة هو الخطأ كلنا ذنوب وكلنا بنغلط قال سيدنا رسول الله صل الله عليه وسلم
( كل بنى آدم خطاء وخير الخطائين التوابون )
والتوبة هى العودة إلى الله طيب نرجع ازاى تعالوا نعرف إللى هنعمله واللى بيتلخص ف الآتى
- الندم على الذنب
- نستعين بالله على التوبة
- مصاحبة الصالحين
- البعد عن كل سبل الذنب سواء كان صاحب أو وسيلة بتوصلنى للذنب ده ودايما" كل واحد مننا عنده ذنب بيرجعله ده إللى تركز عليه وعلى البعد عن اى حاجه بتوصلك ليه
الحاجة الثانية هى اننا نتعرف على ربنا صح
ازاى تعالوا نعرف مع بعض
أولا نعرف كلامه علشان نعرفه صح ونسمع كلامه صح علشان نعظمه صح وقتها هنعرف إن هو الملجأ لينا وهو إللى خلقنا فنفهم من كلامه إنه حليم وعظيم وقوى فنتعرف عليه أكتر
ثانيا " انك تتدبر فى نفسك وفى الكون من حواليك فتشعر بعظمة ربنا
ثالثا" اقرأ عنه وعن أسمائه واستشعرها اقرأ عنه علشان تحبه وترجو رحمته بجد
الحاجة الثالثة نتعرف على رمضان صح
سيدنا النبى صل الله عليه وسلم قال من صام رمضان إيمانا واحتسابا غفر له ما تقدم من ذنبه ، من قام رمضان إيمانا واحتسابا غفر له ما تقدم
وكتير مننا لو سألته عن حكمة صوم رمضان هيقولك علشان نحس بالفقراء طبعا مش ده الهدف
الهدف هو التقوى زى ما ربنا قال ( كتب عليكم الصيام كما كتب على الذين من قبلكم) ليه يارب ( لعلكم تتقون)
والتقوى هى إنك تسيب شوية حاجات حلال علشان تبعد عن حرام وصوم رمضان بيعودك على حاجة اسمها المراقبة
الله يرانى الله يسمعنى الله مطلع على فتبدأ تفتكر انك عبد ولما تفتكر عبوديتك لله تبدأ تطيعه وتتقرب ليه
الحاجة الرابعة هى اننا نتعرف على القرآن صح
لازم نقرأ القرآن بتدبر ونفهم ونربط الآيات ببعضها ونهتم اننا نفهم معناها وقتها هيلمسك القرآن ويغير فيك ولما يلمسك مش هتسيبه بعد رمضان وهتتعلق بيه ولما تتعلق بيه هيبدأ ينضف قلبك ولو قلبك نضف وقتها أوامر ربنا بالنسبالك هتبقى أسهل مايمكن تعالوا نعيش رمضان السنادى صح نعيشه عباد لله
فاللهم بلغنا رمضان وقد رفعت عنا البلاء والوباء وطهرت قلوبنا وشفيت مريضنا ورحمت موتانا
وسؤال حلقة النهارده ما هى أطول آية فى القرآن الكريم؟ لا تنسونا من صالح دعائكم
أحبكم فى الله وإلى لقاء آخر والسلام عليكم ورحمة الله وبركاته
ليست هناك تعليقات:
إرسال تعليق