المهندس على ابو القاسم
المهندس على ابو القاسم
قضية الرأى العام المصرى هذه الأيام وبالذات مواقع التواصل الإجتماعى التى قامت بعمل هاشتاج #انقذوا المهندس على ابو القاسم وطالب الجميع بتفعيل الهاشتاج للضغط على السلطات السعودية لعدم تنفيذ حكم الإعدام وهذه هى آخر المحاولات من أجل إعادة النظر ف القضية
طيب هى ايه ومين على ابو القاسم ده إللى هنعرفه من خلال الكلام إللى اتكتب فى أكتر من حساب واكتر من جروب
الاول مين هو على ابو القاسم
الاسم / على ابو القاسم عبد الوارث مصطفى
السن / ٣٥ سنه
الحالة الاجتماعية / متزوج ولديه طفلان
المهنة / مهندس مدنى
التفاصيل
هو مهندس مدنى شغال هناك من ١٣ سنة وشريك فى شركة مقاولات طلب منه أخوه فى مصر إدخال ماكينة تسمى هراس لاراضى المملكة العربية السعودية تستخدم فى أعمال المقاولات
أخوه أصلا صاحب شركة شحن فى مصر وفى عملاء عنده هما إللى طلبوا شحن المعدة للسعودية وعشان يتم الشحن لازم اسم شركة مقاولات هناك الشحنة تروح عليها فالاخ اتصل على على أخوه واتفق معاه والاخ طبعا مش مدى خوانه فراح كلم كفيله السعودى صاحب شركة المقاولات فوافق لان تاريخ على معاه زى الفل طول ١٣ سنه
الشحنة بقى أصلا كانت رايحه لرجل أعمال سعودى هو إللى كان هيستلمها من على لكن للاسف فى الميناء السعودى تم فحص الشحنة وبقوا ما يقرب من ٨٨٠ ألف قرص مخدر
الشحنة رايحة باسم على ابو القاسم فلبس الموضوع واتخبط حكم بالاعدام
التحقيقات فى مصر اثبتت براءة على والسلطات المصرية بعتت للسلطات السعودية الورق إللى يفيد براءة على لكن المحكمة السعودية رفضت الاعتراف بالورق المرسل من مصر ورفضت طلب النقض
رجل الأعمال السعودى المالك الحقيقى للشحنة واللى الشحنة أصلا ريحاله لم يتم استجوابه
المسئولين الحقيقيين عن الشحنة وتجهيزها فى مصر مقبوض عليهم ومحبوسين ومعترفين على اسم رجل الأعمال السعودى غير انهم سبق اتهامهم فى قضايا إرهاب ومخدرات والحمد لله انهم اتمسكوا
على مظلوم والحكم عليه بالاعدام ظلم
لان لو على يعرف إللى فى الشحنة مستحيل كان وافق انها تبقى باسمه أو يوافق أصلا على الموضوع من اساسه محدش هيودى نفسه فى داهيه بالسذاجة دى ويدخل شحنة حبوب مخدرة باسمه عينى عينك
احنا قدام قضية واضحة المعالم ناس حاولت تهريب شحنة حبوب مخدرة عن طريق شركة شحن بأسماء ناس غيرهم علشان لو اتمسكت يبقى مالهمش دعوه
كل المطلوب هو استجابة السلطات السعودية لإعادة محاكمة على بالأوراق الرسمية المرسلة من مصر والصادرة من إدارة مكافحة المخدرات والموثقة بوزارة الخارجية وتفعيل اتفاقية التعاون الأمنى بين مصر والسعودية
هذه القصة التى تم تداولها على مواقع التواصل الاجتماعي لكن أين الحقيقة الله اعلم كل مانملكه فى النهاية هو الدعاء
اللهم اظهر براءته ورده إلى اهله سالما
ليست هناك تعليقات:
إرسال تعليق